الناحية التانية

المزيد

المزيد

المزيد

  إلى الشاعر والناقد السكندرى الراحل / صابر فرج

الذى وافته المنية فى مساء السبت 27/9/2008 الموافق 27 من رمضان 1429  

*********

إيه دخـّل إسمك ف الموضوع دلوقت ؟!!

شوفت ازاى 

مابقاش يجمعنا غير سيرة الموت

شوفت ازاى الدنيا غريبة اوى      

دلوقتى عرفت انا ليه ماقدرتش اقولك حاجة
واتسمرت مكانى …
وانت بتدى الخمسة جنيه للقهوجى آخر مرة
وبتضحك وتقولى وانا قايم احاسب
: مايصحش عيييييب
دلوقتى فهمت انا ليه ماحاسبتش قبلك
فاكر لما واعدتك اجيلك ويا ( حسام )** وماجتش
طبعا ً مانا كان لازم مااجيلكش
طب كنت حارد لمين الكتب اللى حاخدها
والدراسات اللى انت مجمعهالى على جاهين ؟
كان لازم حاجة تعطلنى
أصلى ماكنتش حااستحمل اشوفهم
قاعدين من غيرك بيبصولى
وانا متذنب قدامهم مش عارف اوديهم فين

ياااااااااااااااه
ده اتارى مش بس الغربة اللى بتدبحنا ياعم !!
ده كمان سكينة الموت ف الغربة فظيعة بشكل !!
دانا لسه يادوبك من ساعتين مفتكرك
وانا باستغرب وباقول :
ايه اللى مخلى ( حسام ) بيواظب على مواعيدك للدرجة دى؟
الواد ده عجيب بصحيح
غاوى تمللى يروح للحتت اللى احنا مابنشوفهاش
مش بس ف شعره وحزنه وريحة الموت اللى مصاحبه عينيه
لأ دا كمان فى قراية قلب الناس من جوة
يخرب عقلك (ياحسام )
والله آمنت ان انت رفاعى بجد
طب عارف وحياة المصحف
انا اول مافتحت الصفحة بتاعة ( شوكت ) ****

خفت
مخى ركب طيارة من الرعب وراح لبعيد
كنت مفكر ……….
…………………
لكن اول ما قريت النعى شهقت
إيه دخّـل إسمك فى الموضوع دلوقت ؟
سبحان الله
بقى شوكت هو اللى بيكتب نعيك وانت هناك ؟
هى بتعمل كده ليه ويانا الدنيا دى؟
شوف احنا قعدنا بندعى لشوكت
وبنتخيل شكله و نتكلم عنه ازاى
طب ايه رايك اول ماقريت النعى انا شوفته بجد
كان بيعيط والله
وبينده على ( كرسيك الوحدانى ) ***
يتلقى العزا وياه
ليه كنت ُمصمم رغم الزعل اللى مابينا
تاخد سيرتى وبياناتى وتكتبها بخطك
على ضهر ديوانى ؟
دلوقتى فهمت
طبعاً ….
أمال كان مين حيكمل غيرك يعنى الببلوجرافيا ؟
بس ياترى لو نزل الجزء التانى
حيلحق ( مافيهاش كوابيس )
يغريك تديله مسافة فى روحك
ويقولك على اللى انا ماقدرتش اقولهولك
وانا باشرب أخر كباية شاى وياك
أيوة ….
اتاريك كنت بتستعجل علشان تلحق ليلة القدر
إيه …
هو انت صحيح صدقت انك

المزيد

واقف براكى

كان لازم يعنى

أقوم الصبح أسلم

على كل الناس اللى انا باعرفها

 وما اعرفهاش

ولا اطولشى اتوضى بدعوة (همسة )

وضحكة بيرقينى (محمد ) بيها

ف أول يومى

والكلمة اللى  اتعودتى تقوليهالى

من يوم ما قفلنا علينا أربع جدران

( خلينا ف قلبك وضميرك )؟

 كان لازم …

 تسرقنى سكينة الغربة

وتبعد بينا  بلاد وبحور ووشوش

علشان أقدر أحس بمعنى وجودكم جنبى ؟

يا سلام ع البنى آدم !!!

جوايا حاجات …

مش طايقة تبص ف وشى

مش عارف ابرىء وجعى

من ذنب كبير

ناحية كل الايام الفايتة ف عمرى معاكى

عامل زى ماكون الدنيا

 خدتنى على خوانة 

فاجأة لقيتنى  

( عود درة وحدانى ف غيط كمون )

طب عارفة

على قد ماكانت جوابات القط  لفاطنة ..

بتبهرنا زمان

وبنقعد نضرب كف بكف عليها  

دلوقتى وكل ما باقراها

بتحز ف روحى

مش عارف إذا كنت بابالغ  ف مشاعرى

عشان واحشنّى

ولا دى أنانية غربة

مش عارف حتى اذاكان

فيه فرق مابينهم ولا مفيش

آااااه ….

حتى الآه اللى اتعودت عليها

بقى ليها طعم غريب

حاسس إنها طالعة بدم الروح

معلش تعبتك

بس انا ماقصدتش  

المزيد

فوضى

قدامنا فرصة آخيرة …

نعرف بعض

ونرتب الفوضى !!

وياتبتدى حكايتنا م الآول

يا نفض سيرة الحلم بينا ونعترف

إن الفشل بيكون ف وقت الانكسار

آخر طموح

ممكن خيالنا يحققه .

*******

نيران

المزيد