عيش وجرح

كتبهاأشرف الشافعى ، في 14 أكتوبر 2008 الساعة: 05:48 ص

عيش وجرح

واقف بتدور على ايه عندك ؟!
فكرك يعنى انا ساذج للدرجة دى
علشان ببساطة
أسيبلك ضلى يقولك تانى انا فين ..
أو باعمل إيه
أوحتى باكلم مين ؟!
فكرك أنا ممكن آأمن تانى واسيبلك نفسى
طب حاقدر أحنسالك تريقتك ..
وسط الناس على روحى
وانا واقف أشحت إحساس من عينك
وانت بتضحك على ضلى
الضل اللى خدعته وخليته يغمى عينيه
وانا قاعد ألم بواقى كيانى المهروس م الخوف
وباحنن آخر ذكرى ف روحك !!
ح أتخيل نفسى إزاى وياك ف طريق ؟!
وانا شايفك بتجهز فخ جديد لعمايا
إسمع …
من دلوقتى ورايح
إوعى تهوب من ضلى
حسك عينك …
أسمع وشوشتك تانى ف صدرى
وع الله أشوفك جاى تتمحلس
علشان تدخل تانى تبرطع فيا
وان كان ع العيش و الجرح
إطمن …
انا ناوى أسيبلك إسمى …
وملامحى اللى خانتنى وصبحت شبهك
وسجايرى… اللى كرهت ريحتها بسببك
حتى صحابى اللى كدبت كتير على نفسى
ووافقت أزوق مطارحهم
واحد ورا واحد جوايا عشانك
مابقوش لازمنى
واما تعل الذكرى عليا
مش ح العن يوم ماقابلتك
ولا ح ادى لنفسى الحق ألومك
لكن …
من دلوقتى ورايح
إياك تتمحك فيا
وتبان للناس إن انت برىء…
مش جاحد
أيوة ….
من دلوقتى ورايح
لازم تفهم
إن احنا بقينا
ا ت ن ي ن …..
مش ..
واحد !!