مافيهاش كوابيس

دلوقتى …
ماعادش بيضحك
مع إنه ماكانش بيعرف
غير بس…
يرش البهجة
على وش جهامة أيامك
دلوقتى…
بيبكى ف سره
كل مايدخل …
ويشوفك بتصارع غيبوبة كوابيسك
وتنادى عليها ..
يكتم شهقة فزعه ويرقيك
بدخان أوجاعه ..
يطلق ورد التسابيح
المزحومة ف حلقه
ع الأركان الفاضية
إلا من صدى كوابيسك
وبقايا سجايرك
وديوان  لفؤاد حداد

وقصيدة من أوراق الغرفة  8 

مع كرمشة الورق المتنتور
لقصايد خايبة
ماعرفتش تنهيها…
بنفس الدهشة اللى بتشبه
صرخة طلق القلم اللى إتمرد
على حدة وعيك
و بلاهة سطحية إدراكك
للثابت والمتحول حواليك
الثابت دلوقتى …
عجزه وهوبيستنجد بيك
ترحل وياه …
لبلاد مافيهاش كوابيس
كان دايما يرسم على صفحة خيالاتك
بالحواديت المحفورة ف روحه ..
صورة جدك
حامل عالمية لازهر
اللى استقبل وش القبلة
وسجد سجدة طويلة
يوم ماختمت ف حجره القرآن
ودعالك بالبركة ..
وبإنك تطلع عالم
يومها دعاله بطولة العمر
وقال له ياعالم

!
دلوقتى بيبكى
علشان مش عارف يقرا ..
اللى انت كتبته..
ف تل الأوراق الخرسا…
المرمية قصاده
وبيندم..
علشان ما اتعلمش يفك الخط زمان
مع إنه بكل سهولة …
كان بيفك العقدة المربوطة
على طرف لسان الحكايات
اللى انت مخبيها
ف آخر ركن ف قلبك …
عن  رضوى
كان بيرطب…
صهد الصحرا ف شرايينك
بطراوة بصة بتحضن مشوارك
لمحطة سيدى جابر كل خميس
سألك وانت بتهرب ف كتاب
مش عايز تقراه
إسمها إيه ؟
واتبسم لما لقاك بتلم حروفها
( رض …. رضوى )
طبطب على رعشة خجلك
بسكاته الفاهم
ودخل لشقوق الخوف …
اللى احتل براءة قلقك
ونفاه عن روحك
يعملك إيه ؟!!
م انت اللى قفلت
طريق قلبها بجنونك
من يوم ما قالتلك ..
سيبك م الشعر وشلة أصحابك
والكتب اللى حتلحس مخك
طرطشت عليها رعونة غضبك ..
ومشيت

!!
ورجعت بتلعن كل بنات الدنيا
ودخلت قفلت عليك
وسجنته معاك !!
من يومها…
موصى البنت جارتكم
تسأل عنها ..
ترجع له بتتلجلج
وتقول له لسه مسافرة
دلوقتى إنتحرت أحلامه
ف إنك تطلع عالم !!
مابيتمناش ..
غير إنك تطلع تسرق نفسك

لمحطة سيدى جابر
كل خميسما بيتمناش غير إنك
ترجع ترحل وياه

لبلاد مافيهاش كوابيس
مين عارف ..
مش جايز
تتقابل مع رضوى 

هناك ؟